Rais wa Djibouti, Ismail Omar Guelleh, ambaye amekuwa madarakani tangu mwaka 1999, amewasilisha rasmi ombi la kugombea muhula wa sita katika uchaguzi wa urais unaotarajiwa kufanyika mwezi Aprili, kwa mujibu wa Wizara ya Mambo ya Ndani ya nchi hiyo.
Ombi hilo liliwasilishwa Jumatatu na mkurugenzi wa kampeni yake, Abdallah Abdillahi Miguil, ambaye pia ni mwanachama mwandamizi wa muungano wa vyama vinavyounda serikali, Union for the Presidential Majority (UMP).
Kiongozi huyo mwenye umri wa miaka 77 anaruhusiwa kugombea tena baada ya bunge la nchi hiyo kuondoa ukomo wa umri kwa wagombea wa urais kupitia marekebisho ya katiba yaliyofanyika mwaka jana.
Aidha, katiba ya Djibouti iliwahi kurekebishwa mwaka 2010 na kuondoa ukomo wa mihula miwili kwa rais, hatua iliyofungua nafasi kwa viongozi kugombea zaidi ya mihula miwili.
Guelleh anagombea tena kupitia muungano wa vyama kadhaa vya kisiasa vinavyounga mkono serikali.
Mamlaka za uchaguzi nchini humo zinatarajiwa kuchambua maombi yote yaliyowasilishwa kabla ya kutangaza orodha ya mwisho ya wagombea watakaoruhusiwa kushiriki katika uchaguzi huo.
0 Comments